Почна градба на нов објект на градинка во Гостивар

Се проширува капацитетот за згрижување на деца од предучилишна возраст во Гостивар. Започна изградба на нов објект на градинката „Цветови“ која се наоѓа во близина на основното училиште „Гоце Делчев“. Во објектот ќе може да престојуваат стотина дечиња.

„Секторот за образование при општина Гостивар, аплицираше и го доби овој проект од Министерството за труд и социјална политика во програмата “Проект за подобрување на социјалните услуги”, финансирана од Светската банка и веќе новата градинка со капацитет за над 100 деца почна да станува реалност.“, соопшти градоначалникот Арбен Таравари.

Во рамки на јавната установа „Детска радост“ во Гостивар актуелно функционираат градинките Пролет, Цветови, Сонце и Пчелка, со капацитет од околу 750 деца. Секоја година, се‘ повеќе расте интересот на родителите да ги запишуваат своите деца во градинките, па се создава долга листа на чекање.