Почнаа подготовките за Галичка свадба 2025, во тек е пријавување за зет и невеста

Галичник летово повторно ќе биде во центарот на вниманието на македонската и пошироката јавност со уникатниот бисер на традицијата – Галичката свадба. Месната заедница соопшти дека започнаа подготовките за манифестацијата која ќе се одржува на празничниот петровденски викенд од 11 до 13 јули.

„Уште еднаш ќе ги отвориме ковчезите за чеиз, ќе се дотераме во свечено свадбарско руво, ќе си накитиме бајрак и со три пушки ќе ја најавиме радоста на наште младенци кои својата љубов ќе закитат со венчавка во Галичник. И оваа година доследни на традицијата, ќе ги спасиме од заборав нашите вековни обичаи и со свадбени поворки, песна и ора и ќе направиме уште една незаборавна Галичка свадба!“, наведуваат од Месната заедница на Галичник.

Заинтересираните парови кои сакаат да ја крунисаат својата љубов на Петровден може да се пријават до 20 април.

„Испратете е-пошта на [email protected] со наслов „За избор на зет и невеста“ и раскажете ни зошто токму вие сте вистинскиот пар. Предност ќе имаат оние кои: имаат потекло од Галичник (двајцата или еден од нив), веќе биле дел од Галичката свадба во друга улога, се активни членови на месната заедница, парови за кои ова ќе биде прв црковен брак.“, известуваат организаторите.

Одлуката за избор на зет и невеста на Галичка свадба 2025 ќе биде објавена најдоцна до 31 мај.