Менувањето од летно на зимско сметање на времето носи ризик од стрес и депресија

Ноќеска сабота кон недела (26-ти и 27-ми октомври) ги враќаме часовниците еден час наназад. Поточно, во 3 часот после полноќ, се поместуваат на 2 часот. Со ова започнува зимското сметање на времето.

Промената на времето во западна Европа е воведено во 1970 година, поради заштеда на електрична енергија, зголемена продуктивност и поефикасен работен ден. Но, водејќи се по новите истражувања, кои го потврдиле лошото влијание на промената на времето врз луѓето, Европскиот парламент во март годинава изгласа одлука за укинување на летно и зимско сметање на вемето, која ќе важи од 2021 година.

Преминот од летно кон зимско сметање на времето може да доведе до отклучување на депресивни растројства и психички непријатност.

Според психолозите, најранливи се вработените луѓе во активна возраст.

„Младите луѓе со динамично секојдневие и сериозна работа ќе почувствуваат голем физички и емоционален замор, ќе бидат апатични и дезориентирани. Можно е дури и најмалите проблеми во овој период да им предизвикаат силен стрес “, покажале психолошките истражувања.

Стручните лица предупредуваат дека промената на времето има огромно влијание врз чувствителните луѓе, без оглед на нивната возраст.

„Кај луѓето кои се склони да запаѓаат во депресивни и анксиозни состојби, дури и најмала промена во времето може да доведе до силен стрес, кој по околу еден месец да се претвори во дистрес. Тоа е состојба во која човек станува исклучително раздразлив, се кара со луѓето, се затвора во себе и често го злоупотребува алкохолот “, објаснуваат терапевтите.

Според нив се потребни 1-2 недели за да може нашето тело да се навикне на промените во времето.

Експертите советуваат најчувствителните да направат распоред на задачи и постојано да си наоѓаат обврски, за полесно да се справат со стресот и депресијата.