Под најлони кај патарината во Гостивар, на студ, во кал и бедотија живот крпат три семејства со мали деца

Живот под секое човечко достоинство и под секој праг на сиромаштија. Импровизирани живеалишта направени од најлон и штици, кал и влага, се жалното секојдневие на три ромски семејства, кои се лоцирани во близина на  гостиварската патарина. Дечињата не знаат за радосно детство, ни за безгрижна детска игра, а ниту едно од нив не оди на училиште. Честопати остануваат со празни стомаци, се борат со студот назима со оскудна облека и искинати обувки.

„Ова не е живот, гледате и сами. Шаторите си ги правевме од најлони, но од секаде дува, тече вода, и во нив внатре газиме во кал, спиеме во вода. Во зима е уште потешко, не можеме да се стоплиме, врне, има ветер. Најтешко е за децата, немаме услови за нив, не одат ни на училиште. Никој не ни помага, ни државата ништо. Некој вози коли од 300 илјади евра, а некои како нас немаат леб да јадат. Многу е тешко. Јас имам две мали деца, а уште едно ќе се роди, сопругата е бремена. Со вакви услови како да живееме. Треба ли на тие деца да им дадеш јадење, да ги облечеш, топло да им биде“, ни раскажа Алтар Камберов, глава на едно од семејствата.

Овие луѓе велат дека во најлонските шатори покрај патарината во Гостивар живеат околу 4 години. Кажуваат дека немаат лична документација и не примаат социјална помош. За парче леб се снаоѓаат собирајќи старо железо, пребарувајќи по канти и со питачење.

„Правам се што можам барем 100 – 200 денари да ги донесам во денот, за леб, за супа. Ете, тоа јадеме, само леб и супа, за друго нема. Ќе земам некоја количка и собирам отпад, копам по канти. Некогаш и питачеме, што да правиме, среќа има луѓе што ни даваат по 5 , по 10 денари“, вели Алтар, кој во име на сите од семејствата, рече дека најважно е да им се помогне во обезбедување на прикладно живеалиште. Децата да почувствуваат што значи топол дом, без страв дека од накаде ќе дува, тече вода, или пак опасност нешто да им се сруши над главите.

Доколку некој поединец или фирма има воља да им помогне на овие семејства, може да се обрати до нашата редакција за контакт.