Поддршка за штедење на струја се бара и преку верските заедници

Министерот за економија Крешник Бектеши денес оствари средба со поглаварот на Исламската верска заедница, Реисот Шаќир Фетаху, на која побара поддршка за спроведување на мерките за штедење на електрична енергија.

„На состанокот разговаравме за енергетската криза со која се справува државата се со цел да ја добиеме поддршката од ИВЗ за штедење на енергија, која е многу важна во делот на покажување на општествена одговорност од страна на сите институции, но и на сите граѓани на Северна Македонија. Нашата цел е да се подгигне свеста кај сите верници и кај сите граѓани за во овој тежок период кој што следува сите заеднички да заштедиме електрична енергија со цел за побрзо пребродување на оваа криза.“, изјави министерот.

Фетаху рече дека веќе преземаат мерки за рационализација на потрошувачката на струја и ќе дадат придонес да се подигне свеста кај граѓаните за штедење на струјата.

„Секогаш сме докажувале дека во кризни моменти, но и сега ќе бидеме во служба на подигнување на свеста на граѓаните да бидат рационални во користењето на електричната енергија, што е за доброто на целото општество. ИВЗ нема проблем да заштеди или рационално да ја користи енергијата. Во сите наши објекти, кои се над 700 џамии кај нас, секогаш рационално ја користевме струјата. Во текот на следните денови и недели заедно со 13-те муфтиства на ИВЗ и над 1200 вработени во ИВЗ ќе дадеме максимален придонес за подигање на свеста на граѓаните, најпрво со апели во текот на петочните молитви, а потоа и во други форми“, рече поглаварот на ИВЗ.

Средба на министерот со иста цел е најавена и со челниците на МПЦ.