Подготовки за бизнис Саем во Гостивар, потпишан Меморандум за партнерство

Напролет во Гостивар ќе се организира Бизнис саем на кој е предвидено учество на компании од гостиварско и од регионот. Настанот ќе го организираат Општина Гостивар и маркетинг и менаџмент агенцијата „Еуростеп“ од Скопје. Соработката денес беше официјализирана со потпишување на меморандум за партнерство.

„Со потпишувањето на меморандумот се договоривме на 21 и 22 мај, 2022 година да се одржи Бизнис Саем. Со ова ќе овозможиме компании од нашата општина, но и од другите општини да ги промовираат своите производи, но исто така да се претстават и фирми кои не се од нашата општина, а имаат некаов интерес да работат, да отворат некакви бизниси во нашата општина. Деталите ќе ги договараме во следниот период“, изјави градоначалникот Арбен Таравари.

Целта и мотивот за организација се поттикнати од желбата за унапредување и подобрување на бизнис околината и заедницата на ниво на локална самоуправа, беше речено по потпишувањето на меморандумот.

„Драго ми е што Општина Гостивар ни овозможи соработка, затоа што сметаме дека компаниите од цела Македонија имаат голем капацитет и тоа не само за македонскиот, туку и за странскиот пазар“, рече управителката на агенцијата, Шемса Емшериев.

Во склоп на Бизнис саемот во Гостивар најавена е и културно-уметничка програма.