Поевтинува цената на зонскиот паркинг во Гостивар

Зонското паркирање во Гостивар ќе биде поевтино. Од 40 денари за час, цената паѓа на 25 денари. Одлуката за намалување беше донесена на денешната седница на Советот на Општина Гостивар.

„Како што знаете во март 2023 година беше донесена одлука за покачување на цената на СМС пораката за зонски паркинг од 25 на 40 денари. Според нашите анализи и статистики се покажа дека тоа не е добра мерка за граѓаните, поради што решивме да предложиме да се врати старата цена од 25 денари. Воедно се намалува ценатата и за еднонеделни, двонеделни и месечни билети. Овие мерки се со цел да се намалат трошоците на граѓаните“, појасни претставник од Јавното претпријатие за паркинзи и зеленило.

Покрај тоа, поевтинува и чинењето на казните за блокатори за неплаќачите, од 1.200 на 600 денари.

Во дискусијата околу паркирањето, советничката од СДСМ Ема Нешковска даде предлог посебно да се обележат неколку паркинг места од кои собраните средства ќе се користат во хуманирани цели.

„Да се обележат 5 паркинг места за хуманитарни цели, за нив да се воведе посебен број за плаќање и собраните средства да бидат наменети за социјално загрозени, ранливи категории или за лекување, а Советот да одлучува за доделувањето“, предложи Нешковска.

Од ЈП за паркинзи и зеленило рекоа дека раководството во претпријатието ќе дискутира за предлогот и ќе се разгледа дали има услови и можности тоа да се реализира.