Поглаварот на ИВЗ Фетаху порача дека коронавирусот постои и е опасен

В.д. поглаварот на Исламската верска заедница Шаќир Фетаху, изјави дека коронавирусот постои, болеста треба да се сфати сериозно и упати апел граѓаните да ги почитуваат мерките за заштита.

„Оваа болест е вистинска, затоа што сите компетентни органи потврдија во целиот свет дека оваа болест постои и многу е опсана. И нема шега со оваа работа. Ние сме верска заедница и не може  сами да кажуваме дали болеста е вистинска, туку се водиме по компетентните институции. Апелирам, уште повеќе да бидеме сериозни, да се придржуваме кон сите тие критериуми кои ги поставиле компетентните органи“, рече Фетаху.

Претходниот поглавар на ИВЗ, Сулејман Реџепи, на муслимаскиот празник Бајрам даде изјава во која го прогласи коронавирусот за мтров.

Инаку, Фетаху на денешната прес конференција во ИВЗ вети транспарентност и добра соработка со медиумите.

„Оваа наша средба не ја сметам како формалност што треба да се исполни поради куртоазија. Напротив, ИВЗ во РСМ ја цени искрено улогата на медиумите во општеството и ја изразува својата почит во оваа прилика за придонесот што медиумите го даваат кога е во прашање информирањето и јавната дебата во врска со сето тоа што го интересира овдешниот човек. Во тој правец, нашата институција чувствува верска, морална и законска должност да ги почитува правилата на транспарентност и во секој момент и секоја прилика да им овозможи изворни информации на претставниците на медиумите со единствена целти е да си ги извршуваат своите задачи и должности на што поправилен и независен начин. Залагајќи се за полна транспарентност на ИВЗ кон медиумите и јавноста воопшто, јас сакам да подвлечам дека оваа институција секогаш имала и ќе има подеднаков став кон сите медиуми, било да се домашни или странски.“, истакна в.д поглаварот.