Поглаварот на ИВЗ посака мирен и солидарен Рамазан и упати апел за почитување на антиковид мерките

Поглаварот на Исламската верска заедница, Шаќир Фетаху во честитката до муслиманските верници за месецот Рамазан упати и апел да ги почитуваат мерките против ковид 19.

„Месецот Рамазан ни доаѓа со бројни вредности и благослови, со кои ја формираме и возвишуваме нашата личност на достоен верник. Објавата на Светиот Куран во овој месец, како и постот на неговите денови заради Семоќниот Алах, ја зајакнува нашата свесност за Бога, моралот, трпеливоста, жртвеноста, мирот, толеранцијата и хуманизмот. Месецот Рамазан ни нуди свет амбиент, кој треба да се користи во непоколеблива врска со нашиот Творец, со мир со сите, со дарежливост и солидарност со сиромашните, со блискост едни со други. Овој Рамазан исто така пак нè наоѓа во вонредна состојба поради пандемијата КОВИД-19, така што нашето високо ниво на грижа и прецизна дисциплина да ги почитуваме сите мерки со цел да се заштитиме од оваа болест, ќе бидат наша вредност на овој месец, со што ќе дадеме придонес за надминување на оваа состојба, затоа, нека овој месец биде жива инспирација за подигнување на нашата свест за излегување од оваа тешка здравствена состојба.“, се вели во неговата порака по повод месецот Рамазан.

Втора година по ред, поради полицискиот час, намазот кој следува после ифтарската вечера, верниците ќе го клањаат дома. Во периодот кога се отворени џамиите (до пред полицискиот час) верниците треба да се држат до мерките за заштита, да носат маски и одржуваат растојание.