Полицијата до велосипедистите: Движете се прописно по улици, казната е 50 евра!

Од средината на овој месец посебно, на патиштата и улиците во тетовско-гостиварскиот регион забележително зголемен е бројот на велосипедисти-учесници во сообраќајот.

„Бидејќи на многу од сообраќајниците на подрачјето не постојат наменски обликувани патеки за нив, апелираме до велосипедистите да се движат прописно, односно крајно десно по коловозот, еден позади друг. Се апелира, исто така, во вечерните часови велосипедистите да бидат адекватно осветлени и да ги избегнуваат темните улици, да внимаваат на знаците кога свртуваат лево или десно, но и задолжително слезени од велосипед да ги преминуваат улиците на обележани премини и друго. Во спротивно, велосипедистите ќе се соочат со законски предвидените сакнции, односно ќе им се изготвуваат соодветни поднесоци, а зависно од видот на сторениот прекршок, согласно член 97  од Законот за безбедност на сообраќајот на патиштата, предвидени се парични глоби од 50 евра во денарска противвредност.“, подвлекуваат од СВР Тетово.

На возачите на патнички и други возила, пак, им се укажува да бидат максимално внимателни кон велосипедистите и пешаците, особено на пофрекфентните улици. Зашто, меѓу оние кои управуваат велосипеди неретко се среќаваат и малолетници кои не се толку вешти во управувањето и потешко се снаоѓаат, пред се на крстосници, во колони од возила и слично.