Полицијата ги засилува контролите околу училиштата во Гостивар и Тетово

Со почетокот на новата учебна година Секторот за внатрешни работи Тетово стартуваше со повеќе превентивни и други мерки и активности, чија цел, пред се, ќе биде учениците безбедно да стигнуваат до своите училишта и назад во домовите, но и да се пресретнат и санкционираат евентуални нарушувања на јавниот ред и мир и други несакани појави.

„Од 1 септември значително е засилено полициското-сообраќајно присуство околу училиштата, во рамките на кое приоритетно се ослободуваат за движење сите сообраќајни површини во нивна непосредна близина, тротоари и коловози, со што се овозможува непречено и безбедно движење на учениците. Покрај ова, предвидено е поголемо полициско присуство и на крстосниците и автобуските постојки, пред почетокот на утринската и пладневната училишна смена. Полициски службеници на СВР Тетово, според планираното, на дневна основа ќе контактираат со најодговорните на училиштата и двонасочно ќе се информираат за тековната безбедносна состојба, а ќе се одржат и серија состаноци на кои ќе бидат поканети и одговорните за образование во овдешните локални самоуправи, чиј носител ќе биде Отсекот за превенција.“, соопштија од полицијата.

Секторот за внатрешни работи Тетово апелира најмногу до возачите да ја прилагодат брзината во близина на училиштата, задолжително да им даваат предност на учениците и да не ги паркираат возилата на тротоари или во таканаречени „двојни редови“. Во спротивно, посочуваат, ќе се соочат со законски предвидените санкции.