Полицијата на средби со угостителите во Маврово за поголема безбедност во зимската сезона

Во мавровското подрачје денес, полициски службеници од Отсекот за превенција при СВР Тетово во содејство со други служби од тетовскиот сектор, остварија средби со одговорните лица на угостителски објекти и на хотели. Активноста е спроведена врз основа на изготвен план за превенција, а во врска со Новогодишните и Божикни празници, потоа зимската туристичка сезона како и зимскиот распуст за основците и средношколците.

„На средбата на сопствениците и менаџерите им беше укажано на обврската за доследно почитување на законските одредби особено од законот за прекршоците против јавниот ред и мир, како и за нивна должност како правни и одговорни лица или трговци поединци кои вршат угостителска дејност – да преземаат соодветни мерки во таа насока. Посебен акцент беше ставен на употреба или пукање со огнено оружје или со пиротехнички средства надвор од законските прописи. Исто така од страна на полициските службеници беше укажано околу забраната за точење алкохол на малолетни лица, како и за законската обврска од навремено пријавување во полиција на било какви нарушувања и други недозволени појави и однесувања на гостите.“, извести портпаролот на СВР Тетово, Фатмир Реџепи.

Средбата има за цел ефикасно функционирање на МВР и одржување на поволна безбедносна состојба во областите на јавниот ред и мир, криминалитетот и безбедност во сообраќајот.