Полицијата расчистува случај врзан со инцидент пред училиште во Гостивар

Гостиварската полиција работи на документирање и расчистување на случај поврзан со инцидент што се случил пред средно училиште.

Како што соопшти СВР Тетово, вчера (4 октомври) околу 14 часот и 30 минути, полициски службеници на Одделение за внатрешни работи Гостивар привеле 39 годишен жител на Чегране кој се однесувал агресивно и ги навредувал додека преземале службени дејствија во дворот на гостиварско средно училиште.

Нешто подоцна, во 16 часот, чегранецот во СВР Тетово пријавил дека околу 14 часот неговиот малолетен син физички бил нападнат пред средното училиште во кое учел од друг ученик од гостиварски Добридол.

Пријавениот ученик пак, од Добридол во 18 часот и 30 минути пријавил дека околу 13 часот и 30 минути него физички го нападнало едно лице. Според пријавеното, напаѓачот користел тврд, а му се заканил и со остар предмет.