Полицијата во Гостивар со практичен час за првачиња по сообраќајна култура

Првоодделенците од ОУ „Исмаил Ќемали“ во Гостивар поминаа интересно и поучно утро со полициски службеници, кои ги едуцираа околу сообраќајните правила. Во склоп на практичниот час дечињата, учителките и полицајците заедно пеш се движеа по булеварите „Гоце Делчев“ и „Браќа Ѓиновски“.

Првооделенците непосредно имаа можност да видат што е пешачки премин, како правилно се минува улица, што е крстосница и како се постапува на крстосница и како правилно да се движат по улици на кои нема обликувани тротоари.

Целта на оваа активност е подигнување и унапредување на сообраќајната култура на најмладите основци, тие полесно да се снаоѓаат во сообраќајот и да бидат побезбедни на патот од домот до училиштето и обратно.

„Ова е една добредојдена активност за дечињата од прво одделение, со која тие ќе научат како правилно треба да се движат по улица, ќе се запознаат со сообраќајните знаци и правила како за пешаците, така и за возилата коишто се движат по патот“, рече директорката на училиштето, Шпреса Усеини.

Активноста ја организираше СВР Тетово преку Отсекот за превенција, а во неа учествуваа и  полициски службеници од Одделението за безбедност на патниот сообраќај Гостивар.