Полицијата во гостиварско ќе ги интензивира контролите за време на ловната сезона

Престојниот викенд ќе биде отворена новата ловна сезона, која се очекува во наредниот период значително да се интензивира, особено за викендите и празниците.

Со цел навреме да се превенираат незаконски постапки на поединци, а и ловџиите  навреме и непосредно да бидат информирани за последиците од таквите постапки, Секторот за внатрешни работи Тетово  апелира доследно да се почитува  Законот за лов. Од таму најавуваат засилени контроли.

„Со започнувањето на новата ловна сезона, Секторот за внатрешни работи Тетово во соработка со другите служби, значително ќе ги засили контролите низ ловиштата на подрачјето и ќе презема соодветни превентивни и други мерки и активности за спречување и санкционирање на незаконскиот лов. Санкциите за непочитување на одредбите од Законот за лов се мошне ригорозни и доследно и без исклучоци ќе се применуваат кон сите подеднакво, без разлика дали станува збор за ловџии-почетници или за искусни поклоници на овој рекреативен спорт, односно хоби.“, вели портпаролот на СВР, Марјан Јосифоски.

Незаконит лов претставува кривично дело, за кое се предвидени парични и казни затвор од три месеци до три години, зависно од тоа – кога, каде и што е отстрелано.