Полицијата ќе ги подучува гостиварци како да се заштитат од крадци-Ставете аларм и не постирајте слики од одмор

Секторот за внатрешни работи Тетово започна со имплементација на нов проект „Превенција од тешки кражби“. Во рамките на проектот планирани се триесетина средби со граѓани, кои ќе бидат оргнизирани во Тетово, Гостивар, Пирок, Чегране, Врапчиште, Челопек, Неготино, Дебреше и во други места на подрачјето. На средбите, кои се предвидени во урбани, месни заедници и куќни совети, граѓаните поблиску ќе се запознаат со формите и начините за најефикасна заштита од вакви кражби, особено во текот на летноодморската сезона.

„Во летните месеци голем број граѓани подолго време отсуствуваат од куќите и становите или ги оставаат своите возила во дворовите. На граѓаните, посебно ќе им се обрне внимание да не постираат информации и фотографии на социјалните мрежи дека моментно не се дома, туку дека се наоѓаат во некој туристички центар, задолжително да ги заклучуваат вратите, да ги затвораат прозорците и квалитетно да ги обезбедат објектите со наменска алармна или друг вид опрема и да не оставаат вреден накит или пари во домовите пред да заминат на одмор.“, информира портпаролот на СВР Тетово, Марјан Јосифоски.

Полицијата најавува и зајакнување на полициските патроли во вечерните часови, кога и најчесто се извршуваат ваквите кражби, најмногу во куќи и станови.