Полицијата со апел: Проверете ја исправноста на тракторите и не ги давајте на деца

Несреќите со трактори и друга земјоделска механизација зачестуваат во текот на летниот период, поради што полицијата потсетува и апелира до земјоделците од полошко да ги почитуваат правилата и прописите. Во апелот на Секторот за внатрешни работи Тетово се вели сопствениците на трактори и друга земјоделска механизација навреме да ги регистрираат, зашто нема да се толерираат вакви недостатоци и доколку бидат затекнати на патиштата, против оние кои ќе ги управуваат нерегистрираните трактори ќе следуваат соодветни поднесоци

„До сопствениците на трактори се апелира, исто така, технички да ги проверат, особено нивните сопирачки и светлосните уреди, бидејќи неретко се движат по патиштата и во вечерните часови. Покрај ова, им се укажува да не им ги даваат да ги управуваат тракторите малолетни лица или лица без соодветна дозвола и доследно да ги почитуваат ограничувањата за брзина, но и сите други сообраќајни правила и прописи.“, наведуваат од СВР.

Полицијата неколку години наназад спроведуваше проект за поголема безбедност на земјоделската механизација во сообраќајот, во чии рамки земјоделците на непосредни средби со полициските службеници поблиску беа запознати со активностите што треба да ги преземат како учесници во сообраќајот, за дa ги избегнат можните законски импликации.