Полицијата во „лов“ на нелегални пејачки и танчерки во гостиварско-тетовскиот регион

Во текот на овој месец, на подрачјето на Секторот за внатрешни работи Тетово биле спроведени 11 акциски контроли, 5 во Гостивар и 6 во Тетово, во 12 угостителски објекти, за откривање на странски државјанки, кои непријавено престојуваат и нелегално работат во објектите.

„Во овие контроли затекнати се 66 странски државјанки. Најголемиот број од нив -50 биле од Албанија, 6 од Косово, 5 од Србија и по една од Црна гора, Босна и Херцеговина, Хрватска, Бугарија и Грција. Без малку сите го злоупотребиле туристичкиот престој, односно престојувале спротивно на целта и нелегално работеле како пејачки, танчерки, келнерки или друг угостителски персонал.“, соопшти СВР.

Речиси сите странски државјанки, претежно на возраст од 18 до 40 години, биле депортирани во нивните матични земји, откако претходно биле изведени пред судија за прекршоци, кој им изрекол парични казни и времени мерки-забранет влез во Република Македонија од 1 година.

Секторот за внатрешни работи Тетово најави дека и во наредниот период ќе спроведува редовни и акциски контроли за откривање и законско санкционирање на странски државјанки, кои непријавено престојуваат и работат на подрачјето и за нивна евентуална инволвираност во проституција, трговија со луѓе или други незаконски активности.

Инаку, во изминатите шест месеци од годинава на тетовско-гостиварското подрачје спроведени биле 17 акциски контроли во 21 угостителски објект, во кои биле откриени 63 странски државјанки, најмногу од Албанија, Србија и Косово.