Полн храм на Светата Литургија за Божиќ во Гостивар

Православните верници од Гостивар го прославуваат големиот христијански празник, Божиќ.. Утрово, црквата „Пресвета Богородица“ беше полна со верници од сите возрасти кои заеднички се радуваа на денот на Христовото раѓање. Со Светата Архиерејска Литургија чиноначалствуваше Митрополитот тетовско-гостиварски г.Јосиф, во сослужение со повеќе свештенослужители.

Пред верниците беше прочитано божиќното послание кое го упати архиепископот охридски и македонски г.г. Стефан заедно со Светиот архиерејски синод на Македонската православна црква -Охридска архиепископија. Во него се вели: Возљубени чеда во Господа, празникот на Христовото рождество е празник на радоста, на мирот и на љубовта. Доаѓањето на Бога на земјата донесе радост, зашто Бог е радост. Затоа богољубивите луѓе секогаш се радосни, и тие ќе го наследат Царството небесно. „Радоста е пропаст за тагата, поткрепа во неволите, утеха во молитвата, олеснување на болката, сокровиште на надежта, храна на подвижниците, извор на љубовта и сопатник на трпението”, пишува свети Нил Синајски. Затоа, ако сакаме да имаме мир и љубов, треба да започнеме од радоста, и тоа токму од празникот на Христовото рождество. Секое раѓање е нов живот, нова радост, а раѓањето на Богомладенецот е најголема радост, радост за сите луѓе и за сите времиња.

Литургијата заврши со причестување на верниците, меѓу кои имаше и многу дечиња.

Христос се роди! Вистина се роди!