Полнети печени јаболка – вкусен есенски десерт

Јаболкото како овошје изобилува со многу витамини и минерали корисни за човекот и се препорачува да се јаде секојдневно. Полно е калиум, калциум, фосфор, натриум, железо, потоа витамини од групата Б, Ц, Е и фолна киселина. Листата на бенефити за здравјето на човекот од овој плод е долга: го регулира нивото на шеќерот во крвта, го намалува ризикот од многу болести, помага во одржување на тежината…

Во есенскиот период домаќинките често подготвуваат печени јаболка. Оваа варијанта, освен што е исто така здрава, добра е и против болно грло. Наш избор денес е токму овој десрт:

Состојки:

• 4 јаболка
• 1 лажица рендана кора од лимон
• 1 лажица мелени ореви или бадеми
• 1 лажица путер
• 1 лажица суво грозје
• 1/8 л бело вино или вода
• 1 лажица шеќер

Подготовка:

Измиeте ги убаво јаболката, не ги лупете, само полека отстранете ја дршката и семенките од јаболкото без да го поделите на половина, отстранете го и делот од цветот. Потоа во еден сад измешајте ги сувото грозје, шеќерот, путерот и кoрата од лимон и со неа полнете ги јаболката.

Земете тава и во неа налијте го виното/водата, ставете ги јаболката и печете на 250 целзиусови степени околу 30 минути.

Кога ќе се испечат можете да ги украсите со шлаг и шумски плодови. Или украсете со чоколада и малку цимет.