Положување цвеќе во чест на 18 Ноември, Денот на ослободувањето на Гостивар

Гостивар го одбележува Денот на ослободувањето на градот, светол датум од историјата. Во таа чест претпладнево со одржа собир и положување на цвеќе на споменикот на паднатите борци од НОВ во градскиот парк. На настанот присуствуваа почитувачи и продолжувачи на слободарските традиции од Гостивар и други градови, претставници на политички партии, здруженија, македонската армија, полицијата.

„Денес заедничи го одбележуваме најзначајниот ден од историјата на нашиот град Гостивар, кога за прв пат е вистински ослободен со што се создадоа услови за слободен живот, во слободна Македонија. Од тој, 18 ноември 1944 година нашиот град пулсира како слободен град кој се движи по патеката на својот постојан развиј“, нагласи во поздравниот говор, професорката по историја Катица Аврамоска.

Претседателот на гостиварската боречка организација, Радислав Ѓиноски, упати честитка до граѓаните по повод празникот, во реферат потсети на настаните врзани со конечното ослободување на Гостивар и истакна:

„На денешен датум во не така далечната 1944 година слободарската искра длабоко проникна, се издигна и го ишара небото над гостиварското поднебје, а слободарскиот град по долгите векови мрак и студенило ги загреа срцата и ги стопли душите на граѓаните. Тој слободарски зрак го осветли патот на новото време. Затоа денешното чествување го посветуваме со пиетет и љубов кон сите што се бореа и ја изборија слободата.“

Букети цвеќе положија делегации на: организацијата на борци Гостивар, АРМ-Касарна „Кузман Јосифоски-Питу“ Тетово, Организација на борци од Тетово, МВР, СУБНОР (Штрбац, Косово), Здружението на акцијаши Гостивар, ГАКУД „Браќа Ѓиноски“.

Како и делагации на: ОК ВМРО-ДПМНЕ, ОО СДСМ и  Движење ЗНАМ.

Присутните со едноминутно молчење им оддадоа почит на жртвите за слобода.