Полжавот Семи е нов светски првак – Помина 33 сантиметри за 2 минути и 38 секунди

Повеќе од 200 полжави учестуваа на годинешното Светско првенство, кое се одржа во Конгам, Велика Британија.

Како секоја година почнувајќи од 1960, правилата за натпреварувањето не се променети. На маса, поставена е стазата за натпреварување, тоа е влажна крпа на која се обележани три кругови, црвен – стартна линија, жолт – средна линија и црвен – целта. Првиот кој ќе стигне на целната линија е победник.

Натпреварувачите кои сакаат да учествуваат може да си донесат свои полжави или да изберат од понудата на организаторот.

Учителката Марија Велби, годинава беше најсреќна бидејќи нејзиниот миленик полжавот Семи успеа да биде најбрз на натпреварувањето. Дистанцата од 33 сантиметри, Семи ја помина за 2 минути и 38 секунди, што го направи најбрз полжав на светот.

“Јас сум крајно возбудена, излегов утрово како обична жена, а сега сум сопственик на светски првак”, изјави Велби, за англиските медиуми.

Семи не успеа да го обори светскиот рекорд од 1995, кој го држи полжавот Арчи, од 2 минути и 20 секунди.

„Годинава трките беа неверојатни, ова беа најдобри трки последнава деценија“, изјави тренерот на полжавите, Нил Ризеболт.

На настанот учестуваа 215 полжави, од кои 13 влегоа во финалната трка.