Поплаки и незадоволство од „Мој термин“

Граѓаните коишто секојдневно се обраќаат во канцелариите на Народниот правобранител, се почесто го изразуваат своето незадололство од проектот „Мој
термин“, кој наместо да придонесе за поедноставен и ефективен начин на здравствена заштита создаде хаос во јавното здравство. Ова е наведено во годишниот извештај на Народниот правобранител за 2016-та година.

Во продолжение на извештајот стои: „Критиките на граѓаните не стивнуваат, тие секојдневно се жалат на (не)функционирањето на овој новитет, на непотребното чекање со недели и месеци за неопходни и неодложно-итни прегледи, снимања, и други медицински испитувања, кои поради својата ургентност можат да бидат и со фатални последици. Токму од овие причини, а се со цел што побрзо да дојдат до медицинска услуга, дијагностика, интервенција граѓаните со влошена здравствена состојба и со разни високоризични заболувања, иако осигуреници, се приморани да пристапат и да ги користат услугите на приватните здравствени установи, чии цени поради монополската поставеност се превисоки, за и онака скромниот стандард на граѓаните“.
Омбудсманот излегува со препорака сериозно да се преиспита проектот „Мој термин“ и врз основа на темелна анализа да се воочат недостатоците. „Проектот можеби е добро замислен, но очигледно е со пропусти и слабости во имплементирањето, што го прави неефикасен“, стои во извештајот.