Попустите низ дуќаните во Гостивар – реални или лажни?

Трговците ги „ловат“ муштериите со попусти и акциски цени, особено во периоди на празници или менување на сезоната. Низ Гостивар, на излозите на секој втор бутик, продавница за чевли, чанти и слично, поставени се реклами за намалување на цените на производите и распродажби. Граѓаните кои пазарат имаат различно мислење и искуства за реалноста на попустите. Некои се задоволни, други сметаат дека се изманипулирани. Контролите пак на пазарните инспектори покажале дека во последниве години, трговците се подисциплинирани во однос на тоа прашање. Во првите два месеци од годината, биле прочешлани петнаесетина дуќани во кои бил наведен попуст и не биле констатирани неправилности.

„Може да кажам дека последните години, за разлика од порано трговците го почитуваат законот во однос на попустите. Немаме констатирано лажно рекламирање на цени“, вели Живко Максимоски, раководител на Пазарен инспекторат во Гостивар  

Најверојатно трговците не сакаат да ризикуваат и да ги прекршуваат законоските одредби за попустите поради високите казни за таков вид на прекршок кои се движат од 1.000 до 4.000 евра.

Годинава, гостиварското одделение на Пазарната инспекција постапувало по четири преставки од граѓани, но тие не се однесувале на попустите, туку на неисправна техника, најчесто мобилни телефони. Сите биле решени во корист на граѓаните.