Поради болеста „чума“ воведена забрана за увоз на овци, кози, нивно месо и млеко од Бугарија

Агенцијата за храна и ветеринарство донесе Решение за забрана за увоз и транзит од Бугарија на живи домашни и диви мали преживари, семе, јајце клетки и емброни, нивно месо, производи и преработки од месо,  млеко и производи од млеко, како и нуспроизводи. Решението е резултат на болеста Чума кај овци и кози, која од 22 јуни годинава е потврдена во соседна Бугарија, а во земјите од регионот присутна е и во Турција.
„Чумата кај малите преживари (овци и кози) е вирусно заболување кое брзо се шири во стадото и предизвикува големи економски загуби кај оваа категорија животни и не претставува опасност за луѓето. Симптоми по кои може да се препознае ова заболување во стадото се: треска, рани во устата, дијареа, пневмонија (проблеми со дишењето), абортуси кај гравидните животни, смрт кај животните. Болеста најтешко се манифестира кај младите животни, а кај козите повеќе од овците. Вирусот се излачува преку солзите, назалниот секрет, со кашлање и преку изметот од заразените животни, а болеста се шири преку директен и близок контакт меѓу животните. Водата, коритата за исхрана на животните и постелката, исто така, може да бидат контаминирани со секрети и да бидат дополнителни извори на инфекцијата“, наведуваат од Агенцијата.
Агенцијата за храна и ветеринарство апелира до одгледувачите на овци и кози, до ветеринарните друштва и официјалните ветеринари да го пријават секое сомнително грло и доколку и кај едно животно забележат симптоми на оваа болест, на сите животни од одгледувалиштето да им се оневозможи движење надвор од одгледувалиштето од каде не смее да се изнесуваат и производи од животинско потекло, опрема, измет и ѓубре.
Агенцијата достави известување до сите ветеринарни друштва да го зголемат нивото на претпазливост и веднаш да пријават до официјалните ветеринари евентуални сомнителни грла.