Поради гужвата, дворовите во училиштата во Гостивар стануваат привремени паркинг места

Дворовите во основните и средни училишта во Гостивар стануваат привремени паркиралишта. Овој потег се прави поради зголемениот број на возила во периодот кога печалбарите престојуваат во родниот крај.

„Со цел да се овозможи нормален и проточен сообраќај, Секторот за внатрешни работи Тетово, во соработка со општините Тетово и Гостивар, како привремени паркинг простори, ќе ги пушти во употреба дворовите на училиштата на местата каде што има зголемена фрекфенција во сообраќајот. Во градското подрачје на Тетово граѓаните возилата можат да ги паркират во дворовите на средното училиште ,,Кирил Пејчиновиќ“, -Гимназија, кај старото медицинско училиште, како и кај основното училиште ,,Истикбал“. Во Гостивар, за оваа намена, привремено се ослободени за паркирање дворовите на сите основни и средни училишта, кои се наоѓаат во градот.“, соопшти СВР Тетово.

Полицијата апелира до возачите, да ги користат овие привремени паркинг простори, кои се бесплатни, возилата да не ги паркираат каде што ќе стигнат, да ги почитуваат законските правила и прописи во сообраќајот, за да се овозможи нормален сообраќај. Казните за погрешно и непрописно паркирање се движат од 20 до 180 евра во денарска противвредност или порамнување со негативни поени.