Пораст на бројот на заразени со коронавирус во земјава, во Гостивар мирно

Расте бројката на нови случаи на коронавирус во Македонија, покажува неделниот извештај на Институтот за јавно здравје, кој се однесува на периодот од 18 до 24 октомври. Од тестирани вкупно 21.461 материјали, регистрирани сe 2.704 нови позитивни случаи, што е зголемување од 22,6% во однос на претходната недела. Процентот на позитивност се движи од 8,7% до 15,9%, просечно 12,2%. Најголем дел од регистрираните случаи се од Скопје (1.285). Во посочениот период во Гостивар се потврдени само 8 новозаразени.

„Со статус „оздравени“ се стекнале 1.924 лица кои биле хоспитализирани или на домашно лекување. Во текот на мината недела вкупно се пријавени 36 реинфекции, што е зголемување од 5,9% во однос на претходната недела. Пријавени се 79 смртни случаи во 19 града во текот на изминатата недела, најголем дел од нив се од Скопје (29). Најголем број (n=70; 88,6%) од починатите припаѓаат на возрасната група над 60 години, а регистрирани се починати лица и кај возрасната група од 40-49 години (4), од 50-59 години (3) и 30-30 години (2 лица).“, пишува во извештајот.