Посебен сообраќаен режим утре во Тетово поради посетата на Курти

Утре 11-ти август (петок) во Тетово, по повод престојoт на официјална делегација на Република Косово, Секторот за внатрешни работи Тетово ќе воведе посебен сообраќаен режим во централното подрачје во периодот од 5 часот наутро до завршувањето на официјалната посета.

Во овој период ќе биде забрането паркирање на возилата на булеварот „Маршал Тито“, на потегот од крстосницата со улицата „Видое Смилевски-Бато“ до плоштадот, булевар „Благоја Тоска“, улица „ЈНА“. Покрај ова, нема да биде дозволено паркирање  на улицата „ЈНА“, на потегот од крстосницата на улицата „Димо Гавровски-Кара“ до булеварот „Илинденска“, како и на булеварот „Илинденска“, на потегот од крстосницата на булеварот „Маршал Тито“ со улицата „ЈНА“, на улица „Тодор Циповски-Мерџан“ и дел од улица ,,Иво Рибар Лола“.

На сите други улици во градот каде е веќе забрането паркирање ќе се санкционираат и подигнуваат возилата, со цел да се обезбеди непречено и безбедно движење на другите учесници во сообраќајот, велат од полицијата.

Секторот за внатрешни работи Тетово со апел до граѓаните во петок 11-ти август да не се движат со нивните возила во централното подрачје без поголема и неодложна потреба, но и да имаат разбирање и трпение за изменетиот сообраќаен режим и да ги почитуваат и да постапуваат по наредбите и насоките на полициските службеници, со што непосредно ќе придонесат за безбедна реализација на официјалната посета на косовската делегација.

Како што претходно беше најавено, утре премиерот на Косово, Албин Курти ќе им биде гостин на градоначалниците на Тетово и на Чаир, Биљал Касами и Висар Ганиу.