Посета и новогодишни пакетчиња за Здруженијата на слепи и глуви лица во Гостивар

Традиционално во деновите пред новогодишните празнувања, гостиварската локална самоуправа ги посетува здруженијата на ранливи категории граѓани, остварува средби со нивните членови и им подарува пакетчиња. Така денес, претставниците од Секторот за социјални дејности беа во посета на Здружението на слепи и лица со оштетен вид „Реалност“, и Здружението на глуви „Тишина“.

„Општината, а посебно градоначалникот секогаш покажуваат посебно внимание кон лицата со попреченост, така е и овој пат. Благодариме на соработката, поддршката што постојано ја добиваме, која ни е од големо значење. Годината што изминува беше добра, но се надеваме дека наредната ќе биде уште подобра, поуспешна. На сите лица со попреченост им ги честитам празниците и им посакувам здравје и се‘ најубаво“, рече Џеват Фејзули, претседател на „Реалност“ , здружение кое има над 60 члена.

Благодарност за вниманието и посетата изразија и од Здружението „Тишина“.

„Благодариме на Општина Гостивар што секоја година не‘ не забораваат и не‘ посетуваат и се надеваме дека и понатаму ќе продолжиме со соработка“, рече Билјана Среткоска, секретар на Здружението во кое членуваат 25 граѓани.

Како што истакна раководителката на општинскиот Сектор за социјални дејности Имерлие Салиу новогодишни пакетчиња ќе бидат поделени и за учениците во специјалните паралелки во училиштата, како и останатите центри кои ги посетуваат деца и лица со посебни потреби.