Последен ден за пријавување за земјоделски субвенции

На полноќ завршува рокот за поднесување на барања за субвенции за земјоделците. Со Програмата за дирекни плаќања во земјоделието и сточарството опфатени се производителите на  полјоделски и градинарски култури, лозови и овошни насади, одгледувачи на говеда, овци, кози, пчели, свињи, а субвенции се предвидени и за заклани животни во кланица.

Од Министерството за земјоделие упатија апел земјоделците да го запазат рокот. Доколку пак, им е потребна помош околу аплицирањето кое се врши по електронски пат, да се обратат во подрачните единици.

Пријавувањето се врши преку регистрирање во системот на веб страната на Агенцијата за финансиска поддршка во земјоделството и руралниот развој www.ipardpa.gov.mk

Според последните објавени податоци вчера за субвенции аплицирале 60.350 земјоделци од целата земја. Надлежните очекуваат бројката да се зголеми со оглед дека дел од граѓаните имаат навика да го чекаат последниот ден.

Од Министерствот нагласуваат дека е важно да се испочитуваат роковите,  за да може да се продолжи постапката за обработка на решенијата за исплата на субвенциите.

Во сабота пак, на 1 август завршува рокот за пријавување за користење на средства од ИПАРД 2 програмата. Оваа мерка е наменета за инвестиции во растително и сточарско производство, преработка и директен маркетинг на сопственото земјоделско производство, и за производство на енергија од обновливи извори за сопствена потрошувачка.