Потсетување: Семејствата на загинатите и другите патници од кобниот автобус да поднесат барања за помош во општина Гостивар

Општина Гостивар ги потсетува семејствата на загинатите и другите патници во автобусот што се преврте во близина на селото Ласкарци, дека можат да поднесат барање за финансиска помош во Oпштинскиот центар за услуги, кој се наоѓа на приземјето на општинската зграда.

„Членовите на семејствата на загинатите треба да поднесат Извод на умрените на починатиот, копија од личната карта и број на трансакцијата на подносителот на барањето. Другите патници треба да достават само копија од личната карта и број на трансакциската сметка. Во име на повредените лица кои сé уште се во болница, барање можат да поднесат членови на потесното семејство.“, информираат од локалната самоуправа, со напомена дека при доделување на помошта, општината го користи официјалниот список на патници обезбеден од МВР.

Согласно одлуката на Советот на општина Гостивар донесена на последната седница, на семејствата на настраданите им се доделува парична помош од 30.000 денари, а на останатите патници по 15.000 денари.

Дел од семејствата и граѓаните на кои им следува оваа еднократна паричната помош, веќе се пријавиле, додека останатите за да го остварат правото мора да поднесат барање.