Потсмирена состојбата на инфективно во Гостивар – утрово испишани се 6 излечени пациенти

Се потсмирува состојбата на инфективното одделение во гостиварската болница. За разлика од претходниот период, кога имаше по 20-тина пациенти со ковид, моментално хоспитализирани се 11. Утрово како излечени биле испишани 6 пациенти.

„Од овие 11 случаи кои моментално се хоспитализирани, една пациентка е во потешка состојба. Останатите се со средно-тешка клиничка слика. Еден пациент е амбулантски, направен му е денес тест, се очекуваат резултатите, не знаеме во овој момент дали е позитивен или негативен, но има ниска сатурација. Да појасниме, сатурација е капацитетот на белите дробови, значи колку му работат. Поради тоа, ќе инсистираме да се испрати за Скопје. Сега за сега, на одделение мирна е ситуацијата. И тие што се нови случаи позитивни во Гостивар, штом не се јавуваат кај нас на одделение, значи се со полесна клиничка слика.“, информира раководителот на инфективно д-р Ратко Наумоски.

Лекарите нагласуваат дека не може да се предвиди какви ќе бидат тековите во следниот период. На граѓаните им препорачуваат максимално да ги почитуваат заштитните мерки.

„Секој да биде свесен дека вирусот постои и да ги почитува мерките, носење маска, држење растојание и миење на рацете“, вели инфектологот Наумоски.