Потсмирена состојбата со корона во Гостивар деновиве, мерките даваат резултат сметаат лекарите

Изминатите денови стивнат е интензитетот на ширење на коронавирусот во гостиварскиот регион, се бележи благо намалување на бројката на новозаразени граѓани, како и на амбулантски случаи. Статистиката покажува дека во полседните пет дена има вкупно 100 новозаразени, а околу 130 оздравени пациенти. Лекарите сметаат дека за подобрувањето на состојбата придонесуваат рестриктивните мерки кои беа воведени пред две недели, а опфаќаат полициски час од 20 навечер до 5 наутро и забрана за служење гости во угостителските објекти.

„Општо земено е потсмирена состојбата деновиве, намален е бројот на амбулантски случаи. Мислам дека за тоа помагаат и мерките што се донесени од Владата, Министерството за здравство заедно со Комисијата за заразни болести, затоа што луѓето претходно се групираа и надвор навечер и во локалите, без маски. Сепак, сетоа тоа зависи и од нашата култура и совест, мора да научиме дека треба да се почитуваат тие мерки за заштита, носење маски, дистанца и високо ниво на хигиена. Секако, во борбата против ковид тука е и вакцинацијата, треба сите да вакцинираме за да се намали бројот на болни“, вели д-р Ратко Наумоски, раководител на инфективно одделение во Гостивар

Д-р Наумоски информираше дека на инфективното одделение денес се лекуваат 23 пациенти, од кои 6 се на кислородна поддршка и се во релативно добра општа состојба, на интерното хосиптализирани се 12 лица од кои 8 се на кислородна поддршка, еден утрово починал, а на нервното одделение има вкупно 7 пациенти со ковид, од кои 6 добиваат кислород.

Викендов што измина во болницата „Д-р Ферид Мурад“ беше пуштен во употреба централен систем на кислород до сите болнички одделенија, со вкупен капацитет од 1,5 тони. Централен довод на кислород ќе добие и модуларната болница.