Потврдени со корона до сега 3.497 лица од општините Гостивар, Врапчиште и М.Ростуше

Вкупната бројка на дијагностицирани со коронавирус од почетокот на пандемијата, во општините Гостивар, Врапчиште и Маврово Ростуше изнесува 3.497 лица. Според податоците од Институтот за јавно здравје моментално на ова подрачје активно болни се 448 пациенти. Ковидот бил кобен за 153 граѓани, кај кои завршил со смртни последици, додека 2.896 лица оздравеле.

Според последниот неделен извештај на ИЈЗ за периодот од 4 до 10 јануари во земјава се бележи намалување на бројот на смртни случаи за 20,4%, за 14,8% е зголемен бројот на оздравени лица споредено со претходната недела, додека бројот на позитивни зголемен од 6,1%. Процентот на позитивност се движи од 11 до 25%, просечно 19%.

Регистрирани се заболени лица во сите возрасни групи. Најзастапена е возрасната група на лица на возраст над 60 (25,2%). Голем број на заболени се регистрира и кај лицата во возрасните групи од 40-49 (19,0%), 50-59  (18,4%), 30-39 (18,4%) и 20-29 (13,4%). Најмал број е регистриран кај децата од 0-9 (1,6%) и 10-19 години (4,0%).

Во однос на симптоми кои се пријавени кај заболените, најчесто се регистрирани температура (68,4%), кашлица (40,0%), малаксаност (39,4%), ослабен осет за мирис и/или вкус (27,3%), главоболка (22,2%), мускулна болка (18,3%), болка во грло (14,3%) и отежнато дишење (9,9%).