Поучна приказна: Жена ми не ме слуша!

Еден човек се плашел дека жена му престанала да слуша добро. Помислил дека и е потребна лекарска помош. Се плашел дека ќе ја натажи и навреди ако и каже искрено дека има проблем со слушањето. Одлучил да побара некој доктор и со него да се посоветува за состојбата на неговата жена.

Докторот му кажал дека може на многу едноставен начин да открие за каков проблем се работи.

-Вака ќе направиш, му рекол докторот, ќе се оддалечиш од неа 10 метри и ќе и поставиш едно прашање. Ако не слушнеш одговор ќе се приближуваш до неа и ќе ја прашуваш постојано едно исто.

Човекот така и направил. Додека жена му била во кујната тој се оддалечил 10 метри и прашал:

-Што има за ручек?

Немало одговор.

Се приближил поблиски и рекол:

-Жено, што има за ручек?

Повторно нема одговор…

На крајот дошол до неа и уште еднаш ја прашал:

-Што има за ручек?

– Аман, три пати истото ме прашуваш, ти кажав пилешко и компири!

Проблемот не мора да биде во некој друг како што секогаш мислиме. Може да биде и во нас самите.