Повторно кампување пред Собрание за поддршка на лицата со посебни потреби

Граѓанската иницијатива за изедначување на правата на лицата со посебни потреби „5 до 12“, од утре (вторник, 20-ти јуни) повторно ќе кампува во паркот Жена борец во Скопје, спроти Собранието на Р.Македонија. Како што велат организаторите, целта е лицата со попреченост, хендикеп или посебни потреби да останат во фокусот на јавноста, и да се наметнат приоритети на Собранието и Владата.
Во рамки на тридневниот камп ќе се оддржуваат консултации во врска со барањата, дополнувања на барањата, одредување на приоритети, усвојување на стратегија и програмски активности, подготовка и потпишување на Меморандум за соработка помеѓу здруженијата поддржувачи на иницијативата. Предвидени се и работилници, спортски активности и друштвени игри.

„Повелете на игра, забава и консултации во врска со законските и подзаконските акти, заедно да ја дадеме поддршката за изедначување на правата на лицата со попреченост, хендикеп или посебни потреби“, стои во повикот на организаторите.

Ова ќе биде трето кампување по ред на „5 до 12“ . Претходно тие ги собраа потребните потписи за поддршка на иницијативата за промена на повеќе закони и подзаконски акти, со кои треба да им се олесни животот на лицата со посебни потреби. Едно од поважните барања е да се избрише старосната граница од 26 години во законите за здравствено осигурување и социјална заштита, со која овие лица се дискриминирани, односно по навршување на 26 години немаат право на бесплатни лекови и на посебен паричен додаток.