Повторно контроли за пушењето низ локалите

По јануарските контроли низ угостителските објекти, пазарните инспектори повторно проверуваат дали и колку се почитува Законот за заштита од пушење низ угостителските објекти. Забраната за пушење во затворено најчесто се прекршува во зимскиот период кога поради постуденото време, сопствениците за да не ги загубат гостите, им дозволуваат да пушат внатре во локалите.

Денес во најголемиот дел од локалите низ Гостивар не беше дозволено пушење, а дел од граѓаните го искористија сонцето, па запалија цигара на масите поставени надвор.

Законот е дециден: пушењето е забрането во сите угостителски објекти:кафеани, кафулиња, ресторани, пицерии и слично. Ако сака да запали цигара, гостинот треба да излезе надвор од објектот. На пушачите им е полесно налето, кога седнуваат на отворените летни тераси од локалите.

Казните за прекршителите не се занемарливи. За правното лице казната изнесува од 2000 до 4500 евра, а за пушачот што ќе биде затекнат на лице место, од 150 до 300 евра.