Повторно одложен стартот на сезоната во кошаркарското првенство

Имајќи ја предвид целокупната епидемиолошка ситуација во земјата и фактот дека бројот на новозаболени секојдневно се зголемува, раководството на Кошаркарската федерација на Македонија донесе одлука за одложување на почетокот на натпреварувачката сезона 2020/21.

Најквалитетното кошаркарско натпреварување после првото пролонгирање од 7 дена, беше договорено да започне викендов, на 10 и 11 октомври, но тоа нема да се случи. КК Гостивар требаше да гостува кај ФМП Академија во првото коло, за во второто да ја пречека екипата на Работнички.

„Во очекување на комплетните резултати од PCR тестирањето за корона-вирусот кое го спроведуваме, а со кое беа опфатени сите клубови од Првата лига-мажи, како и официјалните лица, а поради неможноста да се предвиди временската рамка во однос на евентуалниот почеток на првенството, во овој момент не може да се гарантира дека започнувањето на националниот шампионат би имал регуларен тек. Во наредниот период, Федерацијата ќе ја следи состојбата во нашата држава од здравствен аспект. Во консултации со Комисијата за заразни болести и Институтот за јавно здравје ќе биде донесена одлука за почетокот на натпреварите од Првата лига-мажи“, се вели во соопштението на КФСМ.