Пожарникари, полиција, брза помош во иднина ќе се повикуваат на 112

Владата на Република Македонија на денешната седница усвои информацијата за воспоставување на единствен комуникациско – информативен систем со единствениот европски број за итни повици Е-112 во Република Македонија. Како што соопштуваат од прес службата, Владата го задолжила Центарот за управување со кризи во наредниот период, заедно со неколку надлежни министерства, како и институции да најде начин за обезбедување финансиски средства потребни за реализација на активностите.

Така во иднина, сите итни случаи, како пожари, инциденти, потреба од итна медицинска помош ќе се пријавуваат на 112.

Бројот Е-112 е единствен европски број за повици при итни случаи, воведен со одлука на Советот на Европската Унија во јули 1991 година. Овој број ги обединува сите системи за прием на итни повици и реакции во итни случаи и вонредни ситуации. Повиците упатени на бројот 112, мораат да бидат на соодветен начин одговорени и процесирани. Тоа што бројот 112 е во Европа, тоа е бројот 911 во САД и 000 во Австралија.