Пожарот на депонијата Русино се гасне со 4 противпожарни возила

Противпожарната единица на Гостивар интервенира на гаснење на пожарот, кој утрово избувна на регионалната депонија Русино кај Гостивар. Пожарникарите се на терен од пред два часа, и прават напори целосно да го угаснат огнот.

Командирот на единицата, Јусуф Бајрами вели дека во гаснењето се вклучени три возила од гостиварската пожарна, а се обратиле и до своите колеги од Тетово, кои испраќаат уште едно противпожарно возило.

Како што веќе информиравме, на депонијата е запален отпад, а почетокот на гаснење беше отежнат поради работи за асфалтирање на патот кој води до Русино.

Во меѓувреме, граѓаните почнаа да реагираат дека се издигнува голем чад, се шири непријатна миризба и стравуваат од последици по загадување на воздухот.