Познати поетите кои се борат за наградите на „Литературни искри 2017“ во Гостивар

 Во конкуренција на над седумдесет поети од Македонија и повеќе балкански земји, избрани се финалистите кои влегуваат во трка за наградите на Меѓународниот поетски фестивал „Литературни искри 2017“ во Гостивар.

Центарот за култура „АСНОМ“ , организатор на манифестацијата ги објави имињата на авторите кои ги придобија вниманието и бодовите на жирито: Симона Ристеска (Прилеп), Вања Изова Велева (Струмица), Лара Миховилович (Словенија), Кристина Мерклер (Гостивар), Ива Пуовиќ (Скопје), Марина Јовановиќ (Србија), Соња Шијаков (Штип), Цветанка Колева (Кавадарци), Фросина Тасевска (Штип), Томислав Захов (Стар Дојран), Ирена Јурчева (Скопје) и Билјана Дејаноска (Гостивар).

Овие автори се борат за фестивалските награди: Гран при, прва, втора и трета награда како и Награда за најдобар странски автор и Најуспешна млада искра. Наградите се состојат од плакети и книги.

Годинава песните пристигнати на конкурсот ги оценуваше жири комисијата во состав претседател: Вера Чорниј –Мешкова (поетеса, литературен критичар, член на ДПМ) и членовите: м-р Јанко Билбилоски (Советник во Биро за развој на образование, автор на книги) и м-р Луан Зенки (ликовен уметник, директор на НУЦК „АСНОМ“).

Дел од поетите кои учествуваа на конкурсот, според бодувањето на жирито, ќе бидат застапени во заедничка збирка, која ќе се промовира на манифестацијата. Четвртото издание на Меѓународниот поетски фестивал „Литературни искри“ во Гостивар ќе се одржи на 20-ти мај, со поетско читање на финалистите и соопштување на наградените.

Центарот за култура АСНОМ од Гостивар го организира поетскиот фестивал во чест на 24-ти мај, Денот на сесловенските просветители.

Медиумски покровител на овогодинешното издание на манифестацијата е gostivarpress.mk