Пратеничката Стојаноска отвори локална канцеларија, но просториите се без струја

Пратеничката на ВМРО ДПМНЕ од Гостивар, Дафина Стојаноска денес официјално отвори канцеларија за комуникација и средби со граѓаните. Сепак, функционирањето ќе биде тешко, затоа што просторијата како и останатите во објектот предвидени за пратеници нема електрична енергија.

„Официјално означуваме почеток на локалната пратеничка канцеларија на ВМРО ДПМНЕ во Гостивар, во овој сегашен мандат. Им порачувам на сите мои сограѓани дека оваа канцеларија ќе биде отворена секој работен ден, по 5 часа. Ова е канцеларија на граѓаните, каде може да дојдат да се пожалат, пофалат, да прашаат и сето тоа што со нив ќе го разговарам ќе се обидам да го пренесам во Собранието и да побарам помош и одговор за секое нивно прашање. Би сакала да апелирам до локалната самоуправа да се изнајде решение за еден проблем што го има делот за пратенички канцеларии и на останатите колеги пратеници. Тоа е дека овие канцеларии се без струја. Се надевам дека ќе ни излезе во пресрет локалната самоуправа, затоа што знаете без струја има секако проблем за добро функционирање. Минатиот мандат беше навистина тешко за функционирање, и лете и зиме, особено на зима, тешко и да не речам неизводливо“, изјави Стојаноска.

Координацијата во пратеничката канцеларија, која се наоѓа до општинската зграда и подрачните министерски одделенија, ќе ја води асистент. Средба со граѓаните, Стојаноска ќе одржува еднаш или два пати неделно, зависно работните обврски во Собранието.