Православен празник посветен на Огнена Марија (Света Марина)

Според календарот на МПЦ (Јулијанскиот календар) денеска е 17 јули и се слави празник во чест на Светата великомаченица Марина (Огнена Марија).

Света Марина се роди во незнабожечки дом во Антиохија Писидиска. Со христијанството се запозна и се крсти на свои 12 години, по што доживеа да биде презрена од сопствените родители. Во времето на Диоклецијан, Олимвриј, царскиот намесник во Антиохија, кога слушна дека света Марина е христијанка, а пленет од нејзината убавина, првин сакаше таа да му биде жена. Кога таа одби, ја изведе на суд по секој пропис како христијанка. Света Марина беше цели два дена подложена на мачење и најпосле обезглавена. Поголем дел од нејзините мошти се наоѓаат во манастирот Света Марина, во областа Мала Преспа (македонските села во Албанија), каде се уште се случуваат чуда над нејзините мошти.

Огнена Марија се почитува како борец за христијанската вера и заштитничка на жените. Според народното верување, таа пали и казнува со оган и спаѓа во огнени светци. Обичајот за празникот вели дека поради големата жештина горат небото и земјата и ништо не треба се работи. Во преданијата се наведени примери кога на луѓето кои работеле на овој празник од оган и громови им биле запалени житото, сеното и домовите.

Овој празник е селска слава на гостиварско Зубовце, каде масовно се чествува со црковно-народни обичаи и традиции.