Православните верници го празнуваат Божиќ-најсветлиот ден во христијанството

Православниот свет денес го одбележува големиот празник Божиќ, денот на Христовото раѓање. Верниците се поздравуваат со зборовите „Христос се роди“ , „Навистина се роди“. Празникот е полн со симболика, а во неговата суштина се втемелени љубовта, простувањето и милосрдието.

Според Новиот завет во библијата, Исус се родил во Витлеем, каде неговите родители Марија и Јосиф, дошле од Назарет за попис на населението што било задолжително во тоа време во Римското царство заради плаќање на даноци. Марија и Јосиф кон Витлеем оделе со мало сиво магаре. По долгиот тежок пат, преспивајќи по карпести предели, пристигнале во градот кој бил преполн па не можеле да најдат место за спиење. Еден гостилничар, се сожалил на трудната жена и им ја дал за ноќевање шталата со добиток. Во тој простор во овчарската пештера, Богородица го родила Исус Христос и го положила во јаслите.

Традициите налагаат Божиќ да се празнува во кругот на семејството, во топла и светла атмосфера, каква што Марија и Јосиф создале во пештерата кадешто бил роден Исус.