Православните верници го слават празникот Петровден

Денешниот датум 12 јули во православното христијанство е посветен на чествување на светите апостоли Петар и Павле. Меѓу народот празник е познат како Петровден.

Именден денес празнуваат: Петар, Петре, Петра, Петранка, Петруна…Утре (13 јули) на Павловден, именден слават: Павле, Пајо, Павлина…

Апостолот Петар се смета за олицетворение на  цврстата и искрена вера. На иконите, светите апостоли Петар и Павле се претставени заедно: Петар со клучеви од рајот, а Павле со меч. Постојат различни народни верувања за овие двајца апостоли. Според едни Петар и Павле биле иста личност, според други, тие биле браќа.

Утрото на Петровден се оди во црква, а оној кој постел во Петровденскиот пост се причестува. На овој ден може и да се работи зашто е во време на најголемата жетва, а според верувањето дури и Св. Петар тој ден земал срп и жнеел.