Православните верници во Гостивар слават Велигден, веста за воскресението ја дочекаа заедно во црквата на плоштадот

Пресвета Богородица, Гостивар

„Христос Воскресна-Навистина Воскресна“, со овие зборови, како што налагаат обичаите, православните верници во Гостивар си го честитаа големиот христијански празник Велигден, точно на полноќ. Голем број граѓани се собраа на заедничко чествување во соборниот храм „Пресвета Богородица“ , а со народ беше исполнет и целиот градски плоштад. Пред да се објави веста за Христовото воскресение, свештениците од гостиварското архиерејско намесништво, заедно со верниците го извршија трикратниот опход околу црквата со пеење на Воскресение Христе Твое Спасе. Со биењето на камбаните, се означи Велигден, празникот кога Исус станал од мртвите и ја докажал својата божествена моќ. Одбележувањето на празникот продолжи со утрена и литургија на Свети Јован Златоуст.

Свети Јован Бигорски

Велигден се слави како празник над празниците, победа на животот над смртта. Обичаите и традиците се врзани со црвените велигденски јајца кои го симболизираат повторно раѓање. Се верува дека тврдата лушпа на јајцето го претставува гробот на Исус, а кршењето на јајцата – воскреснувањето од мртвите. Палењето на свеќите пак е симбол на распространувањето на Исусовата светлина која никогаш не гасне. По обичај свеќата се носи дома и со неа се пали кандилото.
Празничната атмосфера продолжува утре, во кругот на најблиските со семеен ручек и подарување на вапсани јајца.