Празнична дружба во новогодишен дух во гимназијата во Гостивар

Со желби за радост и здравје, пораки за сплотеност и заедништво, празнична музика и симболични подароци, гимназијалците во Гостивар денес создадоа новогодишна магија во училиштето. Вредните раце и креативноста на професорите и средношколците го претворија холот во „зимска бајка“ со украси и декорации, а во атмосферата денес на заедничка дружба имаа можност да уживаат основци од гостиварските училишта, како и децата со посебни потреби.

„Идејата произлезе од професорките Фатмире Весели, Блерима Амети, Снежана Китаноска и Елизабета Наумчевска, мене многу ми се допадна и дадов поддршка сето тоа да се реализира. Во активностите за декорирање, изработки и слично учествуваа самите средношколците, а исто така подготвија и музички изведби со кои денес ги пречекуваме нашите гости, учениците од основните училишта и децата со посебни потреби. Имаме и скромни подароци за сите нив. Целта е да се дружиме и да покажеме креативност.“, рече Мирсад Исеини, директор на гимназијата.

Забавно и весело на настанот беше и за гостите и за домаќините.

„Многу не‘ радува што гимназијата денес беше полна со гости, основци, родители, наставници, дечињата со посебни потреби и заедно се дружевме, ја почувствувавме новогодишната атмосфера и секако си посакавме среќна и успешна нова 2023-та година“, рече пом.директорката Светлана Јовановска.

Гимназијалците ги испишаа своите желби и пораки за Новата година на ѕидната табла со надеж дека ќе им се исполнат.