Празникот Балаклија прославен во црквата Св.Петка во Гостивар

Православните верници денес го одбележуваат празникот посветен на Мајката божја и нејзините чуда, Источен Петок-Балаклија, кој секогаш се слави на првиот ден петок по празникот Велигден. Во Гостивар централното празнување традиционално се случува во црквата Св.Петка, најстариот храм во градот. Со светата литургија утрово чиноначалствуваше митрополитот тетовско-гостиварски Г.Јосиф, во сослужение на свештеници од гостиварското архиерејско намесништво. Потсетувајќи на значењето на празникот Владиката порача:
„Кога верата е голема може да помести и планини. Треба да поработиме секогаш да имаме жар во нашето срце за нашата вера што повеќе да се зголемува“.

Црквата Св. Петка ја посетија голем број верници, кои според обичаите оставаа велигденски јајца.
Источен Петок-Балаклија спаѓа во Светлата недела и со него се оддава признание на Пресвета Богородица, поради тоа што непосредно по Велигден нема друг празник поврзан со нејзиното име. На овој ден се празнува обновувањето на храмот на Богородица во Цариград, наречен Живоносен Извор, поради чудотворниот извор со вода што се наоѓа во него.
Празникот освен во градската црква Св. Петка, православните христијани од гостиварско со голем црковно-народен собир го одебележуваат и во селото Долно Јеловце.