Празникот Водици во Вруток прославен традиционално со уникатни обичаи

Гостиварското село Вруток има специфично одбележување на празникот Богојавление – Водици, според датумот на прославата, која е на 20-ти јануари и уникатните обичаи кои се изведуваат во реката Вардар.

Уште од рано утрово во Вруток се чувствуваше празничната атмосфера за како што се нарекуваат Женски Водици, особено на центарот на селото кадешто се собираат кумовите со семејствата, како и во црквата „Свети Архангел Михаил“. Тоа е храмот во кој кумовите се упатуваат, следат литургија, а потоа во дворот го развиваат орото придружено со зурли и тапани.

Радоста и исполнетоста јасно се гледаат во очите на сите кои учествуваат во традицијата. Кумовите со гордост ја носат селската носија, а во носии се облекуваат и млади невести и дечиња. Глетка која ја милува и топли душата.

По орото се слегува надвор кон реката Вардар и се пее песната „Во Јордање“. Таму кумовите сосе котлињата со крстот влегуваат во Вардар.

Граѓаните што се насобрани околу фрлаат јаболка во реката, а кумовите во дисазите собираат од овошјето, и истовремено и си фрлаат вода еден на друг и го рисаат народот за здравје. На тој начин со крстовите ја осветуваат и водата. Се верува дека и јаболката се осветени, а од нив земаат и граѓаните, па потоа ги јадат за здравје.

„Кумовите секогаш се водени од глава до пети. Интересно е што и кога имало многу минуси температури и порано се одело и пешки до дома така водени, ниеден до сега не се разболел, колку и да бил воден. Значи господ помага. Ова ни останало традиција во Вруток и вечно ќе ја чуваме.“, вели Звонко Богданоски, жител на селото.

Обичаите за Женски Водици всушност почнуваат неколку дена претходно, односно од 17-ти јануари, кога се сучат врвките за крстовите со црвено-бела волница. Потоа се оди во црквата „Св. Мина“ каде се врзуваат крстовите.

„Во Вруток има 4 маала и секое има свој крст. На 18 јануари со врзаниот крст секој кум оди по куќите во своето маало, тој ден е строг пост, се јаде гравче, туршија и греана ракија. На 19-ти  доаѓаме во црква, кумовите ги земаат котлињата со крстот на кој има и босилек, излегуваме надвор поставуваме 2-3 маси и кумовите почнуваат да го одврзуваат крстот со пеење на песната „Во Јордање“. Кога ќе завршат со одврзувањето ја сечат врвката на парчиња и секој граѓанин од кумот си добива парче, од тој крст на коешто маало припаѓа. Тука завршува кумството на стариот кум и му се предава на новиот кум“, ни појасни Богданоски.

Како и секогаш и годинава, прославата на Женски Водици во Вруток собра многу народ, кој со интерес и задоволство ги следи и учествува во традиционалните обичаи.

За многу години!