Пред гостиварци промовирана книгата „Херои од хартија“

Додека си го откопувам својот лик

од твојот поглед заматен,

создаваме неповторлива сцена,

Како фрагмент од слика на Ботичели.

Живи, и со крв исполнети вени,

дожд кој за нас се лепи како смола,

безгрешен израз и сомнителна тишина,

нежен стисок на ветрот по голата кожа.

Дрвја кои се извишиле до небото,

нема сенки – се` е толку нестварно,

од чувства изграден скромен декор

тишина – па шепот со ехо.

Кој е авторот на сликата без потпис?

На небото само една молња,

тоа е вертикален потпис од Бога.

„Потпис“ беше една од песните коишто беа претставени пред љубителите на пишаниот збор вчеравечер, на промоцијата на стихозбирката „Херои од хартија“ од гостиварецот Дејан Крстески, што се одржа во Центарот за култура „АСНОМ“.

Ова е негово четврто книжевно дело. „Песните во оваа книга зборуваат за кршливоста на човекот и душевната алергија, но и за потребата да се бунтува кон она што ни се случува во денешницата, кога најголем дел од луѓето трагаат по квази емоции. За херојот велиме дека е добар човек кој им помага на другите луѓе. Но, кој му помага на херојот? Затоа сакам да порачам, бидете најголеми херои пред се`-за себе! Книгата им ја посветувам на сите оние кои се почувствувале осамени, тажни, кои се бореле со депресија, да знаат дека не се сами и не се единствени во таа болка.“, рече авторот.

За творештвото и стиховите во новата книга, на промоцијата зборуваше новинарот и публицист, Киро Кипроски.

„Зборовите на Крстески несомнено заземаат значајно место во современата македонска поезија. Ова дело е збирка за интелектот кој трага по вистината, љубовта и убавината, за духот кој е во потрага по моралот на своето време, за бесмислата која се вовлекува во умот на младиот човек до болка“, истакна Кипроски, кој е и рецензент на книгата.

Дејан Крстески е роден во Скопје, 1986 година. Дипломирал македонски јазик и книжевност на филолошкиот факултет и психологија на филозофскиот факултет на Универзитетот „Св. Кирил и Методиј“ во Скопје. Автор е и на збирките раскази „Поглед кон небото“ и „Чист хероин“, и на стихозбирката „Луѓе без лица“. Добитник е на повеќе литературни награди и признанија.